ວັນທີ 20 ມັງກອນ 2012 ຂະນະທີ່ ທ່ານ ທອງສິງ ທໍາມະວົງ ນາຍົກລັດຖະມົນຕີ, ພ້ອມດ້ວຍທ່ານ ສຸກັນ ມະຫາລາດ ເລຂາທິການສູນກາງພັກເຈົ້າຄອງນະຄອນຫລວງວຽງຈັນ ແລະ ທ່ານ ດຣ. ນາມວິຍະເກດ ລັດຖະ ມົນຕີວ່າການກະຊວງອຸດສາຫະກໍາ ແລະ ການຄ້າລົງ ໄປຢ້ຽມຢາມໂຮງງານ, ເມື່ອວັນທີ 20 ມັງກອນ 2012 ນີ້, ທ່ານ ແສງມາລີ ແສງວັດທະນາ ປະທານສະພາບໍລິ ິຫານບໍລິສັດ ລາວ-ອິນໂດໄຊນາກຣຸບ ມະຫາຊົນ ລາຍງານວ່າ: ຂະບວນການປຸກລະດົມປະຊາຊົນປູກມັນຕົ້ນ ແລະ ສ້າງຕັ້ງໂຮງງານຜະລິດແປ້ງມັນຕົ້ນແມ່ນໄດ້ນໍາ ເອົາແນວ ທາງນະໂຍບາຍ ຂອງພັກ ແລະ ລັດມາຈັດ ຕັ້ງປະຕິບັດຈົນໄດ້ຮັບຫມາກຜົນຄື:
ດ້ານໂຮງງານໄດ້ຫັນຈາກການຜະລິດແບບປະຖົມປະຖານມາເປັນການຜະລິດ ທີ່ທັນສະໄຫມຂຶ້ນເທື່ອ ລະກ້າວ, ສາມາດ ສ້າງວຽກເຮັດງານທໍາປົກກະຕິສ້າງລາຍຮັບໃຫ້ປະຊາຊົນ ແລະ ແກ້ໄຂຄວາມທຸກຍາກໄດ້ໃນລະດັບອັນແນ່ນອນ.
ສ່ວນໂຄງການປູກມັນຕົ້ນ ແມ່ນແນໃສ່ເມືອງທຸກຍາກຄື: ເມືອງສັງທອງ ນະຄອນຫລວງວຽງຈັນ, ເມືອງຮົ່ມ ແຂວງວຽງຈັນ, ເມືອງບໍລິຄັນ ແຂວງບໍລິຄຳໄຊ ແລະ ເມືອງອື່ນໆ, ມາຮອດ ປະຈຸບັນ ເນື້ອທີ່ມັນຕົ້ນມີ 7.689 ເຮັກຕາ ໃນ 3 ແຂວງ, 13 ເມືອງ 171 ຫມູ່ບ້ານ, ມີຜູ້ປູກ 2.713 ຄອບຄົວ, ຜົນຜະລິດທັງຫມົດຍັງບໍ່ສາມາດຕອບສະຫນອງໃຫ້ແກ່ການຜະລິດແປ້ງໄດ້ຕາມ ຄວາມຕ້ອງການ ເຊິ່ງແຕ່ລະມື້ມີຄວາມຕ້ອງການມັນຕົ້ນດິບ 1.000-1.200 ໂຕນ, ແຕ່ການສະຫນອງຕົວຈິງໄດ້ປະມານ 70-80% ເທົ່ານັ້ນ.
ພ້ອມກັນນັ້ນ ປະທານບໍລິສັດກໍ່ສະເຫນີ 3 ປະເດັນໃຫ້ລັດຊ່ວຍຄື: ສະເຫນີສຳປະທານດິນລັດ 15 ພັນເຮັກຕາຢູ່ເຂດນະຄອນຫລວງ ແລະ ບໍລິຄຳໄຊ ເພື່ອເປັນສວນສາທິດໃຫ້ປະຊາຊົນມາຖອດຖອນບົດຮຽນ, ຂໍພາກສ່ວນມະຫາພາກໃຫ້ການສະຫນັບສະຫນູນການວາງນະໂຍບາຍ ແລະ ກົນໄກເອື້ອອຳນວຍໃຫ້ແກ່ທຸລະກິດ ແລະ ການສົ່ງອອກ; ຂໍ້ລັດສະຫນອງທຶນປູກມັນຕົ້ນໃຫ້ປະຊາຊົນດອກເບ້ຍຕ່ຳບໍລິສັດຈະ ຄຸ້ມ ຄອງ ແລະ ໃຊ້ຄືນ.
ທ່ານ ທອງສິງ ທໍາມະວົງ ນາຍົກລັດຖະມົນຕີກ່າວວ່າ: ໃນນາມລັດຖະບານຂໍຊົມເຊີຍບໍລິສັດທີ່ມີຄວາມອົດທົນພັດທະນາຕົນ ເອງຈົນປະສົບຜົນສໍາເລັດ, ທີ່ຫນ້າຍິນດີກວ່ານີ້ ຄືການຈະ ເຂົ້າຈົດທະບຽນໃນຕະຫລາດຫລັກຊັບຈົ່ງສືບຕໍ່ຈັດຕັ້ງປະຕິບັດໃຫ້ສຳເລັດ ເພື່ອລະດົມທຶນມາພັດທະນາທຸລະກິດໃຫ້ກ້າວຂຶ້ນ ແລະ ພາກລັດຈະສະຫນັບສະຫນູນເລື່ອງຂອງການປຸກລະດົມຂົນຂວາຍປະຊາຊົນປູກມັນຕົ້ນສະຫນອງໃຫ້ໂຮງງານຜະລິດແປ້ງໄດ້ຢ່າງພຽງພໍ, ຂໍໃຫ້ບໍລິສັດສືບຕໍ່ພັດທະນາໃຫ້ໄດ້ທັງຄຸນນະພາບ ແລະ ປະລິມານມີຍອດສົ່ງອອກໃຫ້ຫລາຍຂຶ້ນ.